Չրեր․ օգտակար թե վնասակար
Չրերի օգտակարության վերաբերյալ տեղեկատվությունը շատ է։ Նույնիսկ շատ-շատ։ Թե՛ մեր առօրյայում, թե՛ օրվա լրահոսի մեջ շատ հաճախ ենք հանդիպում դրանց օգտակարության վերաբերյալ տարատեսակ տեղեկատվության։ Սակայն իրո՞ք բոլոր չրերն են օգտակար։
Այո, օգտակար են, սակայն կարող են նաև լինել վնասակար։ Խնդիրը չորացված մրգերի մեջ չէ, այլ դրանց չորացման գործընթացում կիրառվող քիմական մշակման։ Վաճառակետերում հանդիպող գույնզգույն, շողշողացող և կանչող չրերը հիմնականում անցել են քիմիական մշակում, որի նպատակն է երկարացնել պահպանման ժամկետը, պահպանել կամ ավելի վառ դարձնել մրգի նախնական գույնը, պաշտպանել միջատներից և այլն։
Միջազգային պրակտիկայում , հատկապես խոշոր չրագործական երկրներում, անբարեխիղճ արտադրողների կողմից կիրառվում են չրերին ախորժելի տեսք տալու քիմիական միջամտությունների բազմաթիվ միջոցներ, որոնք հաճախ անհամատեղելի են սննդի հետ․ օրինակ գլիցերինով մշակումը (փայլուն տեսքի համար) կամ հակահիգիենիկ և կեղտոտ միջավայրում չորացնելուց հետո քիմիական լուծույթներով լվանալը՝ ախտահանելու նպատակով։ Օգտագործվող քիմիկատների մնացորդներն էլ չրերի հետ հայտնվում են օրգանիզմում և տարածում իրենց բացասական ազդեցությունը։
Հայաստանում քիմիական մշակման հիմնական տարածված մեթոդը ծծմբի երկօքսիդով մշակումն է։ Մշակումն իրականացվում է ծխահարման միջոցով որոշակի ժամանակահատվածում, որից հետո այն ցնդում է։ Այս միջոցը թույլատրելի է և սահմանաչափերը հստակ ամրագրված են ստանդարտներով ու օրենքներով։ Սա համարվում է անվնաս նորմալ օրգանիզմի համար, եթե պահպանվում են սահմանաչափերը, սակայն այսպիսի մշակում անցած սնունդը խիստ հակացուցված է ասթմատիկներին և ալերգիկներին։ ԾԾմբի երկօքսիդով թունավորման ախտանիշներն են այրոց կոկորդում, սրտխառնոց, գլխացավ, արտադրություն քթից, ձայնի խռպոտում։ ԾԾմբի երկօքսիդը օրգանիզմում քայքայում է վիտամին B1-ը և ամբողջովին ոչնչացնում վիտամին B12-ը։
Առանց քիմիական մշակման ստացվող չրերը հիմնականում ունենում են մուգ գույն, անհամաչափ երանգային գունավորում և այնքան էլ գրավիչ տեսք չունեն։ Սակայն հենց դրանք են այն իրական օգտակար չրերը, որոնց մասին մենք սովոր ենք լսել։ Այսպիսով ձեր կատարած ընտրությունից է կախված թե արդյոք օգտակար են չրերը, թե վնասակար։
Ողղակի հիշենք հայտնի ժողովրդական իմաստությունը․ "Ամեն փայլող բան ոսկի չէ"։
Комментарии
Отправить комментарий